دوسری طباعت 44نودریافت، غیرمدوّن مدّون مکتوبات کے اضافے کے ساتھ این بی ایف نے چھاپی ہے
kuliyatاسلام آباد۔نیشنل بُک فاؤنڈیشن کے زیر اہتمام مترجم ومرتب اور ماہرِمرزا غالب، پرتوروھیلہ کی 972صفحات پر مشتمل ضخیم کتاب’’ کلیاتِ مکتوباتِ فارسیِ غالب، 44نودریافت اور غیرمدّون مکتوبات کے اضافے کے ساتھ 2008ء کے بعد دوسری بارشائع ہو گئی ہے۔ انتساب جمیل جالبی کے نام ہے۔ یہ کتاب غالب شناسی کے حوالے سے اردو اور فارسی شعرو ادب کے طلبہ و اساتذہ اور عام قارئین کے لیے ایک بیش قیمت تحفے کی حیثیت رکھتی ہے جسے ہر علمی لائبریری کی زینت ہونا چاہیے۔ ڈاکٹر انعام الحق جاوید لکھتے ہیں کہ غالب کے لکھے ہوئے ہر لفظ کی اہمیت ہے۔پرتوروھیلہ صاحب نے اپنے اس ترجمہ میں غالبؔ کی ؛لطافتِ خیال، طرزِ ادا اور تحریر کی روان کو متاثر نہیں ہونے دیا بلکہ خصوصیت کے ساتھ یہ کوشش کی ہے کہ اظہاروبیان کا بالواسطہ رنگ بھی قائم رہے اور ندرتِ خیال کی ترسیل میں رکاوٹ بھی نہ آئے جس کے باعث یوں لگتا ہے۔جیسے یہ خط لکھے ہی اردو میں گئے ۔
پانچ سو کی تعداد میں چھپنے والی اس تاریخی اہمیت کی حامل کتاب کی قیمت 700روپے ہے جسے ریڈرز کلب کے ممبران 55فی صد ڈسکاؤنٹ پر صرف 315روپے کے عوض این بی ایف کی ملک بھر کی کسی بھی بک شاپ سے حاصل کر سکتے ہیں۔ یہ کتاب این بی ایف کے اُس مشن اور مقصد کا حصہ ہے جس کے تحت ادبِ عالیہ کو شائقینِ کتب کی دہلیز تک پہنچانے کا اہتمام کیا گیا ہے۔ مرتب نے طلبہ و اساتذہ اور محققین کے لیے اسے دقتِ نظر سے مکمل کیا ہے۔ اس میں غالب کے مکتوباتِ فارسی کے پانچ مجموعے (نامہ ہائے فارسی غالب، باغ دودر، مآثرِ غالب ، متفرقاتِ غالب اور پنج آہنگ) شامل ہیں۔